नागपूर : येथील डॉ. पंजाबराव देशमुख क्रीडा महोत्सव क्रिकेट स्पर्धेतील साखळी सामन्यात तुळशीराम गायकवाड पाटील कॉलेजने दणदणीत विजय नोंदवला. दुसऱ्या सामन्यात डॉ. आंबेडकर महाविद्यालयाने केवळ सात धावांनी विजय संपादन केला. या क्रीडा महोत्सवाचे आयोजन धनवटे नॅशनल कॉलेजच्या शारीरिक शिक्षण विभागाच्या वतीने वसंतनगरच्या मैदानावर करण्यात आले होते.
नुकत्याच झालेल्या आंतरमहाविद्यालयीन क्रिकेट स्पर्धेत तुळशीराम गायकवाड पाटील कॉलेजने संताजी कॉलेजवर तब्बल ८० धावांनी दणदणीत विजय नोंदवला. नाणेफेक जिंकून गायकवाड पाटील कॉलेजने प्रथम फलंदाजी करण्याचा निर्णय घेतला. गायकवाड पाटील कॉलेजने १९.४ षटकांत १६३ धावांचा डोंगर प्रतिस्पर्धी संताजी कॉलेजसमोर ठेवला. गायकवाड पाटील कॉलेजच्या सागर झाडेने उत्कृष्ट फलंदाजीचे प्रदर्शन करत अर्धशतक करून ५२ धावांचे महत्त्वपूर्ण योगदान दिले, तर रोहितने २६ धावा केल्या. ‘संताजी’चे गोलंदाज आदित्य व समीर यांनी प्रत्येकी तीन गडी बाद केले. प्रत्युत्तर देताना संताजी कॉलेजचा संघ केवळ १५.४ षटकांत ८३ धावांवर बाद झाला. ‘संताजी’कडून ऋषभने सर्वाधिक २३ धावा केल्या. गायकवाड पाटील कॉलेजचा गोलंदाज सागर झाडे व निखिल नंदने प्रत्येकी तीन गडी बाद केले.
दुसऱ्या सामन्यात डॉ. आंबेडकर कॉलेजने झुलेलाल कॉलेजवर केवळ सात धावांनी विजय नोंदवला. नाणेफेक जिंकून झुलेलाल कॉलेजने प्रथम क्षेत्ररक्षण करण्याचा निर्णय घेतला. फलंदाजीला आलेल्या आंबेडकर कॉलेजने निर्धारित २० षटकांत पाच गडी बाद करून १७७ धावा केल्या. अक्षयने तुफान खेळी खेळून ७७ धावांचे महत्त्वपूर्ण योगदान दिले, तर प्रतीक बावणेने २६ धावा केल्या. झुलेलाल कॉलेजकडून रोहितने तीन, तर मयूरने एक गडी बाद केला. प्रत्युत्तर देताना झुलेलाल कॉलेजचा फलंदाज अमेयने ६७, तर मयूरने ३७ धावांचे योगदान दिले. आंबेडकर कॉलेजच्या अभिलाषने ३२ धावा केल्या, तर प्रतीक बावणेने एक गडी बाद केला.
